އެތަން އަނބުރައި ނުހޯދައެއް ހަމަ ނޭވައެއްވެސް ނުލާހުށީމުއެވެ!

ޢަބްދުﷲ ރަޝީދު

ގައުމާމެދު މި ޒަމާނުގައި ނުވިސްނާ މިންވަރު އެނގެނީ ގައުމަށް ދެރަކަމެއް މެދުވެރިވާ ހިނދުގައެވެ. ފޯޅަވަހ ހޯދުމުގެ ނަމުގައި ފަށައިފައިވާ ގައުމީ ހަރަކާތާ މުޚާޠަބުކޮށް ބައެއް މީހުން ބުނެއެވެ. "ފޯޅަވައްސަކީ އިރެއްގައި ރާއްޖޭގެ ތަނެއްކަމަކު މިހާރު އެއީ މޮރިޝަސްގެ ތަނެކެވެ." އެއިން އެނގެނީ އެފަދަ މީސްމީހުންނަށް ދުނިޔޭގެ ކަންކަން ހިނގާ ގޮތާއި ޒަމާނާ ގުޅިގެން ދުނިޔޭގެ ހާލަތު ފުރޮޅޭ ގޮތާއި، ގައުމީ ދިފާޢުގައި މުވާޠިނުންގެ ދައުރާމެދެ ހޭލުންތެރިވެފައި ނެތް މިންވަރެވެ.

ހައިރާނެއްފަހެ ނުވާނޭ ހެއްޔެވެ؟ ފޯޅަވައްސަކީ އިރެއްގައި ރާއްޖޭގެ ތަނެއްކަން އެބަހުން އެމީހުންނަށް އެކަމަކު އެބަ އެނގޭތާއެވެ! އެހެންވިއްޔާ! އެތަން މިހާރު ރާއްޖޭގެ ތަނަކަށް ނުވާންވީ ސަބަބެއް ނޯންނާނޭކަން އެފަދަ މީހުން ދަންނަ ކަމަކަށް ނުވިސްނެއެވެ! ބަލަ! ފޯޅަވައްސާއި، އަދި އެތަނާއި ރާއްޖެއާ ދެމެދުގައި އޮތް އައްޑޫބޮޑުކަނޑު ނުވަތަ އައްޑޫ ދެކުނުކަނޑު އެއީ، އިހަށްވެސް މިހާރުވެސް އަދި ގިޔާމަތާ ހަމަޔަށްވެސް ރާއްޖޭގެ މިލްކު ތަންތަނެވެ. އެއަކީ، ފަރަންސޭސީންނާއި އިނގިރޭސީންނާއި މޮރިޝަސް މީހުންގެ ހައްގެއް އޮތް ތަންތަނެއް ނޫނެވެ!

ފޯޅަވައްސަކީ، އިސްތިޢުމާރީ ބާރުގައި (ގަދަބާރުގައި) އަތުލައިގަނެގެން ފަރަންސޭސީން ގެންގޮސް އެތައް އަހަރެއްވާންދެން ބޭނުންކޮށްކޮށްފައި އިނގިރޭސީންނާ ހަވާލުކޮށްފައިވާ ދިވެހި ގައުމުގެ ހަތް ދީބުންކުރެ އެއްދީބެވެ!ނުވަތަ ފެހެންދީބެވެ! ނުވަތަ ފެހުނުގައި އޮތް ފެހުނުދީބެވެ. އެތަން މޮރިޝަސްއަށް ދީގެން އުޅެނީ އިނގިރޭސީން އަމިއްލައަށެވެ. ބައިނަލްއަގުވާމީ ހަމަތަކާ ޚިލާފަށެވެ. ނުހައްގުންނެވެ!

އ.ދ. އިން އަންގައިގެން އުޅެނީ އެތަން އަނބުރައި އޭގެ ހައްގުވެރި ފަރާތާ ހަވާލު ކުރާށެވެ! މޮރިޝަސްއާ ނުވަތަ އެހެންވެސް ގައުމަކާ އެތަން ހަވާލުކުރާކަށެއް އ.ދ. އަކުން އަމުރެއްކޮށް އަންގައިގެނެއް ނޫޅެއެވެ!އެކަމަކު، އެވަރުވެސް ގިނަ ބަޔަކަށް އެނގޭކަމަކަށް ނުވެއެވެ! ވާނީވެސް އެހެންތާއެވެ؟ ދިވެހި ރާއްޖެއަކީ ދިވެހީންގެ ތާރީޚު ކިވައިވާއިދޭ ތަނެއް ނޫނިއްޔާއެވެ!

މިތާނގެ ސްކޫލު ތަކުގައި ތާރީޚޭ ކިޔައިގެން ކިޔަވައިދެނީވެސް، ގާނދީއަކާއި، ޖޯޖްވޮޝިންޓަނަކާއި، އިގުބާލެއްގެ ވާހަކަވިއްޔާއެވެ!

ދިވެހި ގައުމުގެ ދެކޮޅުން ގެއްލިގެން ގޮސްފައިވާ ރަށްތަކާއި ބައިތަކުގެ ވާހަކައެއް ޚަބަރެއް ދިވެހި ޖީލުތަކަށް ފޯރުކޮށެއް ނުދޭވިއްޔާއެވެ! ތާރީޚޭ ކިޔާފައިވެސް ވާހަކަ ދައްކާ މީހުން ދަންނަހައިވެސް އެއްޗަކަށްވަނީ ބައެއް ރަސްދަރިކޮޅުތަކޯލައެވެ!

ދެން ބަލަނީ ކޮންމެވެސް ގޮތަކުން ތިމާމެންނާ ރަސްދަރިކޮޅަކާ ގުޅުވައިލައިގެން ޝާހީ ބައެއްކަމުގެ ރަހަ އަރުގައި ލައްވައިގެން ހިންދިރުވޭތޯއެވެ! އެފަދަ ގިނަ މީހުންގެ ތާރީޚުގެ މަޞްދަރެއް ކަމަށްވަނީ، މަހާނަގާތަކޯލައެވެ!އެހެންވީމާ، ފޯޅަވައްސަކީ، ދީވެހީންގެ ތަނެއްކަމެއް އަހުރެމެނަށް އަދި އަމުދުން ތާރީޚުވެރީން ނަކަށްވެސްް ރޭކައެއް ނުލާނެތާއެވެ!

ފަލަސްތީނު ބިމުގައި އިނގިރޭސީންގެ ގަދަބާރުގައި އުފެއްދި އިޒްރޭލުން ބާރު ހިންގާ ބިންތަކަކީ، އެއްވެސް ގޮތަކުން އިޒްރޭލަށް ހައްގުވާނޭ ބިންތަކާއި ތަކެއްޗާއި ތަންތަނެއް ނޫންކަން، ފަލަސްޠީނީން އަބަދުވެސް ދަނެއެވެ! އޭގެ ދިފާޢުގައި މެދުނުކެނޑި ހަނގުރާމަވެސް ކުރެއެވެ! ދުވަހަކު އިޒްރޭލު ބަލި ނުވިޔަސް ފަލަސްތީނީން އެކުރާ ގައުމީ ދިފާޢީ ހަނގުރާމައެއް ހުއްޓައެއް ނުލާނެއެވެ!

އެހެންވިއްޔާ، އިނގިރޭސީން ފަލަސްތީނު ބިމުގައި އިޒުރޭލު އުފެއްދި ބީދައިން އަހަރެމެންގެ ސަރަހައްދުގައި މޮރިޝަސް އެވެކިޔާ ގައުމެއް އިނގިރޭސީންގެ ގަދަބާރުން އުފައްދާފައި އެމީހުންނަށް ދިވެހީންގެ ތަންތަނާއި ކަނޑާއި ނުހައްގުން މޮރިޝަސްއަށް ދިނީމާ އެކަމަށް ކަނުވެ ފިނޑިވެފައި، އަޅާނުލައި ތިބޭ ބަޔަކަށްވާކަށެއް އަހުރެމެންނަކު ނެތީމެވެ. ދުވަހަކު ފޯޅަވައްސާއި ކަނޑު ނުލިބުނަސް އެ ތަންތަނަކީ މޮރިޝަސްގެ ތަންތަން ކަމަކަށް އަހުރެމެންނަކު ގަބޫލެއް ނުކުރާހުށީމުއެވެ! އެއާ ދެކޮޅަށް އަޑުވެސް އުފުލާނޫއެވެ! އެ އަޑު މުޅި ދުނިޔެއަށް އިއްވާހުށީމުއެވެ! އެތަން އަނބުރައި ނުހޯދައެއް ހަމަ ނޭވައެއްވެސް ނުލާހުށީމުއެވެ!

ކޮންމެހެން ބޮޑުތަކުރުފާނު އެތަން ހޯދާން ނޫޅޭތީ އެކަމާ އުޅެން ނުޖެހޭނޭ، ދޮންބަންޑާރައިން އެކަމާ ނޫޅޭތީ އެކަމާ އުޅެން ނުޖެހޭނޭ، ކިޔައިގެން ދައްކާ ރަނޑާލި ވާހަކަ ދައްކާ ފިޑީންގެ އޮއިވަރެއްގައި އަހުރެމެނަކު ނުޖެހޭހުށީމުއެވެ! މިކަމާ ނޫޅެ ތިބޭންޖެހޭނޭ އެއްވެސް ސަބަބެއް ނެތެވެ!

ދިވެހި ގައުމުގެ ހައްގުގައި ތެދުވުމަކީ ވަކި މީހަކަށް ވަކި ތަކުރަކަށް ވަކި ހަސަނަކަށް އެކަނި އޮންނަ ހައްގެއް ނޫނެވެ! ދިވެހި ކޮންމެ ރައްޔިތަކަށްމެ އޮންނާނެ ހައްގެކެވެ! އަނެކަކު ނޫޅޭތީއޭ ކިޔައިފައި އެންމެންނަކު ތިބޭކަށްވެސް ނުޖެހޭނެއެވެ!