ޕެން ފޯ ރައިޓްސް / އައުޓްރީޗް ކޯޑިނޭޝަން ޑެސްކް
ފޮއްޅަވައި (ޗާގޯސް) އިނގިރޭސި އިސްތިޢުމާރީ އިހުތިސާސްގެ ދަށުން މޮރިޝަސްގެ ދަށަށް ބަދަލުކުރުމަށް ހުށަހަޅާފައިވާ ހުށަހެޅުން ފުރިހަމަކުރުމަށް ތާއީދު ހޯދުމަށާއި، އިނގިރޭސި ބަރުލަމާނުގެ މެންބަރުންނާއި، މަދަނީ ޖަމްޢިއްޔާތަކަށް ބާރުއެޅުމަށްޓަކައި، ގިނަ ދުވަސްތަކެއް ވަންދެން ހަރަކާތްތެރިވެފައިވާ ލުއިސް އޮލިވިއޭ ބެންކޯލް އިސްވެ ހުރެ، ޗާގޯސް ރެފިއުޖީސް ގްރޫޕް (ސީ.އާރު.ޖީ) ގެ ވަފުދެއް، މި މަހުގެ ކުރީކޮޅު އިނގިރޭސިވިލާތަށް ދަތުރެއް ކުރިއެވެ. އޮލިވިއޭ ބެންކޯލްއަކީ ކުރުކޮށް ދަންނަވާ ނަމަ މޮރިޝަސް ފަޅީގެ ޗާގޯސިއަނުން ތަމްސީލުކުރާ ބޭފުޅާއެވެ. ވެސްޓްމިންސްޓާގައި ބޭއްވުނު ބައްދަލުވުންތަކުގައާއި، ސަޕޯޓަރުންނާ އެކު ބޭއްވި ބައްދަލުވުންތަކުގައި ބެންކޯލްއާއެކު ދިޔަ ވަފުދުން ވަނީ، ސިޔާސީ ގޮތުން ކުރިމަތިވަމުންދާ ލަސްވުންތަކުގެ ސަބަބުން ރަށުން ބޭރުކޮށްލެވިފައިވާ ޗާގޯސިއަނުންގެ ތަކްލީފުތައް ދިގުލައިގެންދާ ކަމަށާއި، މިހާރުވެސް ނިމުމަކަށް އައިސްފައި އޮންނަންޖެހޭ އިސްތިއުމާރުން މިނިވަންވުމުގެ މަރުހަލާ ފުރިހަމަކުރުމަށް ހުރަސްއެޅެމުންދާ ކަމަށް ބުނެފައެވެ.
މި ދަތުރުގެ ތެރޭގައި ރިޕޯޓްކޮށްފައިވާ ބަޔާންތަކަށް ބަލާއިރު، ވަފުދުގެ މެންބަރުން އިނގިރޭސި ސިޔާސީ ބޭފުޅުންނަށް ގޮވައިލެއްވީ، ސިޔާސީ ހުރަސްތަކުން ދުރަށްޖެހި، ރަށުން ބޭރުކޮށްލެވިފައިވާ އަހުލުވެރިންގެ ހައްގުތައް ކަށަވަރުކޮށްދިނުމަށް ސަމާލުކަން ދިނުމަށެވެ. އެބޭފުޅުންގެ މެސެޖު ބިނާވެފައިވަނީ އަނބުރާ ރަށަށް ދިއުމާއި، ބަދަލު ހޯދުމާއި، އިންސާނީ ކަރާމާތާއި، އަދި ޗާގޯސިއަނުންނަށް އަލުން އެމީހުންގެ ވަޒަނުގައި ދިރިއުޅުމުގެ ހައްގު ލިބިދިނުމުގެ މައްޗަށެވެ. އާންމު ހަރަކާތްތަކުގައި ވާހަކަ ދައްކަވަމުން، ވަފުދުގެ މެންބަރުން ވަނީ ރަށުން ބޭރުކޮށްލުމުގެ ސަބަބުން ކުރަންޖެހުނު އަމިއްލަ ތަޖުރިބާތައް ހިއްސާކޮށް، މި އަރުވާލުމުގެ ސަބަބުން ޗާގޯސިއަނުންގެ އެތައް ޖީލަކަށް ކުރަމުންދާ ނޭދެވޭ އަސަރުތަކަށް އަލިއަޅުވާލާފައެވެ.
މި ދަތުރަށް އިނގިރޭސިވިލާތުގެ ބައެއް ސިޔާސީ ބޭފުޅުންގެ ތާއީދު ލިބުނެވެ. އޭގެ ތެރޭގައި ލޭބަރ ޕާޓީގެ ކުރީގެ ލީޑަރު ޖެރެމީ ކޯބިން އާއި، ޗާގޯސިއަނުން އަނބުރާ އެ ރަށްތަކަށް ފޮނުވުމުގެ ނަމުގައި ގިނަ ދުވަސްތަކެއް ވަންދެން ވަކާލާތު ކުރައްވަމުންދާ ހައުސް އޮފް ލޯޑްސްގެ މެންބަރުން ހިމެނެއެވެ. އަދި ޚާއްޞަކޮށް އިނގިރޭސިވިލާތާއި، މޮރިޝަސްއާ ދެމެދު ހުށަހެޅިފައިވާ އެއްބަސްވުން ތަންފީޛުކުރުމާ މެދު އުފެދިފައިވާ ނުތަނަވަސްކަމުގެ ތެރެއަށް މި ދަތުރު ދިމާވުމުން، އިނގިރޭސި މީޑިއާގެ ބޮޑު ސަމާލުކަމެއް މިކަމަށް ހުއްޓުނެވެ.
ފުރަތަމަ ނަޒަރުގައި، މި ވަފުދުގެ ތަދައްޚުލުވުމުން ފެނިގެންދިޔައީ ފަހަކަށް އައިސް އިތުރަށް އާންމުވަމުންދާ ވާހަކަތަކެކެވެ. އެ ވާހަކަތަކުގެ ތެރޭގައި، އިނގިރޭސިވިލާތަކީ ފޮއްޅަވައި އިސްތިއުމާރު ކޮށްގެން ތިބި ފަރާތުގެ ގޮތުގައި ބެލެވޭއިރު، މޮރިޝަސްއަކީ ނުނިމި ދިގުލާ އިސްތިއުމާރުން މިނިވަންވުމުގެ މަރުހަލާގެ މަންފާލިބޭ ފަރާތެވެ. އަދި ޗާގޯސިއަނުންނަކީ އަނބުރާ ދިއުމާއި ބަލައިގަތުމުގެ ތެރެއިން އިންސާފު ހޯދުމަށް މަސައްކަތްކުރާ، ރަށުން ބޭރުކޮށްލެވިފައިވާ މުޖުތަމައެކެވެ. މި މާނަކުރުންތަކަށް ބަލާއިރު، މައިގަނޑު ގޮންޖެހުމަކީ މިހާރު ސިޔާދަތީ ބާރު ކަނޑައެޅުމެއް ނޫނެވެ. ނަމަވެސް އެއްބަސްވެވިފައިވާ ސިޔާސީ ނަތީޖާއެއް ތަންފީޛުކުރުމެވެ.
ނަމަވެސް، ބެންކޯލްގެ ލަންޑަން ދަތުރުގެ ސިޔާސީ މުހިންމުކަން، އެ ވަފުދުން ހުށަހެޅި ކަންތައްތަކަށްވުރެ މާ ދުރަށް ފެތުރިގެން ހިނގައިދާނެއެވެ. މި ދަތުރަކީ އެއްބަސްވުމެއް ފުރިހަމަކުރުމަށް ގޮވާލި ގޮވާލުމެއްގެ ގޮތުގައި ދެއްކި ނަމަވެސް، ބައިނަލްއަގުވާމީ ރިޕޯޓްތަކުގައި ނިސްބަތުން މަދުން ސަމާލުކަން ލިބޭ މުހިންމު މައްސަލައަކަށް މިއިން ސަމާލުކަން ހުއްޓުނެވެ. އެއީ ޗާގޯސިއަނުންގެ ފަރާތުން ވާހަކަދައްކަނީ ކޮންބައެއްކަމާއި، އަދި މި ރަށްތަކުގެ މާހައުލުގައި އިސްތިއުމާރުން މިނިވަންވުމުގެ އަސްލު މާނައަކީ ކޮބައިކަމާ މެދު އެއްބަސްވުމެއް ނެތްކަމެވެ.
ޗާގޯސް ރެފިއުޖީސް ގްރޫޕަކީ ތާރީޚީ ގޮތުން ބަލާއިރު، ރަށުން ބޭރުކޮށްލެވިފައިވާ ޗާގޯސިއަނުން ތަމްސީލުކުރާ އެންމެ ފާހަގަކޮށްލެވޭ އެއް ޖަމްޢިއްޔާއެވެ. އެތައް އަހަރެއްގެ ހަރަކާތްތަކާއި ގާނޫނީ ހަނގުރާމަތަކުގެ ތެރެއިން، އެ ޖަމްޢިއްޔާއިން ވަނީ ޗާގޯސިއަނުންގެ ހާލަތަށް ބައިނަލްއަގުވާމީ ސަމާލުކަން ހޯދުމުގައި މުހިންމު ދައުރެއް އަދާކޮށްފައެވެ. މިހާރުގެ ދެބަސްވުމާ މެދު އެ ޖަމްޢިއްޔާގެ ވިސްނުން ވަރަށް ސާފެވެ. އެ ޖަމްޢިއްޔާއިން ތާއީދުކުރަނީ މޮރިޝަސްގެ ދަށަށް ފޮއްޅަވައިގެ އިހުތިސާސް ބަދަލުކުރުން ފުރިހަމަކުރުމަށެވެ. އަދި އެ އޮނިގަނޑުގެ ތެރެއިން އަނބުރާ ދިއުމާއި، ބަދަލު ލިބުމާއި، އަދި ސިޔާސީ ހައްގުތައް ކަށަވަރުކުރުމަށް ގޮވާލައެވެ.
ނަމަވެސް، މިއީ މިހާރު ޗާގޯސިއަނުންގެ ތެރެއިން ފެންމަތިވަމުންދާ ހަމައެކަނި ސިޔާސީ ވިސްނުމެއް ނޫނެވެ. އިނގިރޭސިވިލާތުގައި ރަށްވެހިވެފައިވާ ޗާގޯސިއަނުންނާއި، ޖަމްޢިއްޔާތަކުން ދަނީ މި މައްސަލައާ މެދު ތަފާތު ވިސްނުމެއް ކުރިއަރުވަމުންނެވެ. އެއީ ޗާގޯސިއަނުންނަށް އަމިއްލައަށް ވެރިކަން ކުރުމުގައި ގޮތް ނިންމުމުގެ ސިޔާސީ އިޚްތިޔާރަށް މާ ބޮޑަށް ބާރުއަޅާ ވިސްނުމެކެވެ. އަނެއްކޮޅުން އިނގިރޭސިވިލާތު ފަޅީގެ ޗާގޯސިއަނުން ތަމްސީލުކުރަނީ މިސްލީ މެންޑަރިންއެވެ. އެހެން ކަމުން، މިސްލީ މެންޑަރިން، އަމިއްލައަށް އިޢުލާންކޮށްގެން އުޅޭ 'ޗާގޯސްގެ އަރުވާލެވިފައިވާ ސަރުކާރު' އާ ގުޅުންހުރި ފަރާތްތަކުން ވަނީ، ވަކި ސިޔާސީ މުޖުތަމައެއްގެ ގޮތުގައި ޗާގޯސިއަނުންގެ ޙައްޤުތަކަށް ރިއާޔަތްނުކޮށް، އިނގިރޭސިވިލާތުން މޮރިޝަސްއަށް ސިޔާދަތީ ބާރުތައް ބަދަލުކުރުމުގެ ގާނޫނީޞައްޙަކަމާ މެދު ސުވާލު އުފައްދާފައެވެ. އަދި މެންޑަރިންގެ ސަރުކާރުން ވަކާލާތު ކުރަނީ، އިނގިރޭސި ރަސްކަމުގެ ދަށުގައި ތިބުމަށެވެ. އަދި ފޮއްޅަވަޔަކީ އިނގިރޭސި ދައުލަތުގެ ބައެއް ކަމަށެވެ.
މި ޚިޔާލުތަފާތުވުމަކީ ހަމައެކަނި އުކުޅުތަކެއް ނުވަތަ ލީޑަރޝިޕްގެ މައްޗަށް އޮތް ދެބަސްވުމެއް ނޫނެވެ. މިއީ އިސްތިއުމާރުން މިނިވަންވުމުގެ މާނައާ މެދު އަސާސީ ގޮތުން ހުރި ތަފާތުތަކެކެވެ. އެއް ވިސްނުމަކީ، ފޮއްޅަވައި ހިމަނައިގެން މޮރިޝަސްގެ "ސަރަހައްދީ ފުރިހަމަކަން" ގާއިމުކުރުމަކީ މި މަރުހަލާގެ މައިގަނޑު މަގްސަދު ކަމަށް ދެކޭ ވިސްނުމެވެ. އަނެއް ވިސްނުމުން ވަކާލާތުކުރަނީ، ފޮއްޅަވައިގެ މައްޗަށް އޮތް އިހުތިސާސްގެ އެއްވެސް މިންވަރެއް ބަދަލުކުރުމުގެ ކުރިން، ޗާގޯސިއަނުންގެ ސިޔާސީ ރުހުމާއި އަމިއްލަގޮތް ނިންމުމުގެ ހައްގަށް އިސްކަންދޭންޖެހޭނެ ކަމަށެވެ.
މިފަދަ ވާދަވެރި ވިސްނުންތަކެއް ހުރުމަކީ ބައިނަލްއަގުވާމީ ގާނޫނުތަކަށާއި އިސްތިއުމާރުން މިނިވަންވުމުގެ ސިޔާސަތުތަކަށް ބޮޑެތި އަސަރުތަކެއް ކުރާނެ ކަމެކެވެ. ގިނަ އަހަރުތަކެއް ވަންދެން، އާންމު ބަހުސްތަކުގައި "ޗާގޯސްގެ ރައްޔިތުން" މި ލަފުޒުތައް ބޭނުންކުރެވެމުންއައީ އެންމެންނަކީ އެއް މަގްސަދެއްގައި މަސައްކަތްކުރާ އެއް ސިޔާސީ ބައެއްގެ ގޮތުގައެވެ. ނަމަވެސް ހަގީގަތް މިހާރު މާ އޮޅުންބޮޅުން ބޮޑެވެ. ތަފާތު ސިޔާސީ ތަޞައްވުރުތަކެއް ފެންމަތިވުމުގެ މާނައަކީ، ޗާގޯސިއަނުން ތަމްސީލުކުރާ ފަރާތަކީ ކޮބައިކަމުގެ ސުވާލުތައް މިހާރު މި މައްސަލައިގެ ތެރޭގައި ކުރިއަށްވުރެ މާ މުހިންމު ދައުރެއް އަދާކުރަން ފެށުމެވެ.
މި ކަމުގެ ސަބަބުން، މިހާރު އޮތް އެއްބަސްވުމުގެ ވާހަކަތަކަށް ގޮންޖެހުންތަކެއް ކުރިމަތިވެއެވެ. ރަށުން ބޭރުކޮށްލެވިފައިވާ ޗާގޯސިއަނުންގެ ހައްގުތަކާއި ތަޙައްމަލުކުރާ ކެކުޅުމަކީ، ފޮއްޅަވައިގެ އިހުތިސާސް މޮރިޝަސްއަށް ބަދަލުކުރުމަށް ބައިނަލްއަގުވާމީ ގޮތުން ގޮވާލާ ގޮވާލުންތަކުގެ މައިގަނޑު އުޞޫލީ ބިންގަލެވެ. އެމީހުން ރަށުން ބޭރުކޮށްލުން އެއީ އިސްތިއުމާރީ ބޭއިންސާފުގެ ހެއްކެއްގެ ގޮތުގައި ދައްކާއިރު، ރަށްތަކަށް އެނބުރި ދިއުން މަނާކޮށްފައި އޮތުން، އެމީހުން ދައްކަމުންދަނީ ލިބެމުންދާ ހާނިއްކައެއްގެ ގޮތުގައެވެ. ނަމަވެސް، ޗާގޯސިއަނުންގެ ހައްގުތަކާއި މަސްލަހަތުތަކަކީ މި މަރުހަލާގެ ޞައްޙަކަމުގެ މައިގަނޑު އަސާސް ކަމުގައިވާނަމަ، އެ ސަރަހައްދުގެ ސިޔާސީ މުސްތަގުބަލާ މެދު ޗާގޯސިއަނުންގެ މެދުގައި ހުރި ޚިޔާލުތަފާތުވުންތަކަށް ފުރަގަސްދިނުން ވާނީ އުނދަގޫ ކަމަކަށެވެ.
މިތަނުގައި އޮތް މައްސަލައަކީ ޗާގޯސިއަނުންގެ އެއް ވިސްނުން އަނެއް ވިސްނުމުގެ މައްޗަށް ކުރިހޯދުމެއް ނޫނެވެ. އޭގެ ބަދަލުގައި، މިފަދަ ވާދަވެރި ވިސްނުންތަކެއް ހުރުމުގެ ސަބަބުން، ޗާގޯސިއަނުން ތަމްސީލުވުމާއި ރުހުން ހޯދުމާ މެދު އަދިވެސް ފުރިހަމައަށް ހައްލުނުކުރެވި ހުރި ސުވާލުތަކެއް އުފެދުމެވެ. އުފެދިފައިވަނީ އެއްބަޔެއްގެ ހައްގުތަކަށް ވަކާލާތުކުރާ، ނަމަވެސް ބޭނުންވާ ސިޔާސީ ނަތީޖާއާ މެދު އެ ބައެއްގެ މެދުގައި ޚިޔާލުތަފާތުވުންތައް ހުރި އިސްތިއުމާރުން މިނިވަންވުމުގެ މަރުހަލާއެކެވެ. މިފަދަ މަރުހަލާއެއްގައި ބާރުލިބެންވީ ކާކުގެ އަޑަކަށްތޯއާއި، ވިސްނުމުގައި ހުރި ދެބަސްވުންތައް އެއްބަސްކުރުވާނީ ކިހިނެއްތޯ ސުވާލު އުފެދުމަކީ ކޮންމެ ގޮތެއްވިޔަސް ދިމާވާނެ ކަމެކެވެ.
މީގެ އަސަރުތައް ޗާގޯސިއަނުންނާއި ހަމައިން ބޭރަށްވެސް ފެތުރެއެވެ. މިހާރުގެ ބަހުސް ގިނައިން ބެލެވެނީ އިނގިރޭސިވިލާތާއި މޮރިޝަސް ހިމެނޭ ދެފަރާތުގެ މައްސަލައެއްގެ ގޮތުގައެވެ. އަދި މައިގަނޑު ބޭނުމަކީ މޮރިޝަސް އިސްތިއުމާރުން މިނިވަންވުން ފުރިހަމަކުރުމެވެ. ނަމަވެސް، އަމިއްލަގޮތް ނިންމުމާ މެދު އުފެދިފައިވާ ޚިޔާލުތަފާތުވުންތަކާއި، ދެމިއޮތް ތާރީޚީ ގުޅުމާއި ސަރަހައްދީ ގާނޫނީޞައްޙަކަމާ މެދު ކުރެވޭ ބަހުސްތަކުން ދޭހަވަނީ، މިހާރުގެ ސިޔާސީ ވާހަކަތަކުގައި ހީކުރާ ވަރަށްވުރެ ބޮޑަށް ސިޔާދަތީ ސުވާލުތައް ހައްލުނުވެ އޮތް ކަމެވެ.
މީގެ މާނައަކީ ހުށަހެޅިފައިވާ، މި ރަށްތަކުގެ އިހުތިސާސް މޮރިޝަސް ދަށަށް ބަދަލުކުރުމުގެ މަސައްކަތަށް ގާނޫނީ ނުވަތަ ޑިޕްލޮމެޓިކް ތާއީދު ނެތް ވާހަކައެއް ނޫނެވެ. އަދި ރަށުން ބޭރުކޮށްލެވިފައިވާ މީހުންގެ ޝަކުވާތަކުގެ އަގުވެއްޓޭ ވާހަކައެއްވެސް ނޫނެވެ. އޭގެ ބަދަލުގައި، މިއިން އެނގެނީ ސިޔާސީ ގޮތުން ކަމެއް ތަންފީޛުކުރުމާއި، ސިޔާސީ ގޮތުން މައްސަލައެއް ހައްލުވުމާ ހުރި ތަފާތެވެ. އެއްބަސްވުންތަކާ މެދު މަޝްވަރާ ކުރެވިދާނެއެވެ. ގާނޫނުތައް ހެދިދާނެއެވެ. އަދި އިދާރީ އިންތިޒާމުތައްވެސް ގާއިމުކުރެވިދާނެއެވެ. ނަމަވެސް، ބަޔަކު ތަމްސީލުވުމާއި، ރުހުމާއި، އަދި ގާނޫނީޞައްޙަކަމާ ބެހޭ ސުވާލުތަކަކީ ރަސްމީ ސިޔާސީ މަރުހަލާތައް ނިމުމަށްފަހުވެސް ދެމިގެންދާ ކަންކަމެވެ.
ދިވެހިރާއްޖެއިން މިކަން ދިރާސާކުރާ ފަރާތްތަކަށް، މި ގްރޫޕްގެ ލަންޑަން ދަތުރުން މުހިންމު އިތުރު ކަމެއް ފާހަގަކުރެވިދާނެއެވެ. މި ރަށްތަކުގެ މުސްތަގުބަލާ މެދު ތަފާތު ވާދަވެރި ވާހަކަތަކެއް ފެންމަތިވުމުން އެނގެނީ، ތާރީޚީ އަދި ގާނޫނީ ހުރިހާ ވިސްނުންތަކަކަށް އެކަށީގެންވާ ސަމާލުކަމެއް ދިނުމުގެ މުހިންމުކަމެވެ. ތާރީޚީ ގުޅުމުގެ ދެމިއޮތުމާއި، ކަނޑުގެ ޖިއޮގްރަފީ، ނުވަތަ އިސްތިއުމާރުގެ ކުރީގެ ސިޔާސީ ގުޅުންތަކެއް ހުރިކަމަށް ގަބޫލުކުރެވޭނަމަ، ވަކާލާތުކުރާ ފަރާތްތަކުން ބުނަނީ އެފަދަ މައްސަލަތައް ބަލަންޖެހޭނީ ސައިންޓިފިކް، ގާނޫނީ އަދި ޑިޕްލޮމެޓިކް މަރުހަލާތަކުގެ ތެރެއިން ކަމަށެވެ. އަދި މިހާރުގެ ސިޔާސީ އިންތިޒާމުތަކަށް އޮޅުންބޮޅުން އަރާތީ އެކަންކަން ބަހުސުން ބޭރުކޮށްލައިގެން ނުވާނެ ކަމަށެވެ.
މި ގްރޫޕުގެ ވެސްޓްމިންސްޓާ ދަތުރުން ލިބޭ ބޮޑު ފިލާވަޅަކީ، އިސްތިއުމާރުން މިނިވަންވުމަކީ ގިނަފަހަރަށް ހީކުރާ ވަރަށްވުރެ މާ އޮޅުންބޮޅުން ބޮޑު މަރުހަލާއެއް ކަމެވެ. ބައިނަލްއަގުވާމީ ސަމާލުކަން ވަކި ނަތީޖާއެއް ތަންފީޛުކުރުމަށް ހުއްޓިފައިވީ ނަމަވެސް، އާބާދީ ތަމްސީލުވުމާއި، އަމިއްލަގޮތް ނިންމުމާއި، އަދި ސަރަހައްދީ ފުރިހަމަކަމާއި ސިޔާސީ ރުހުމާ ހުރި ގުޅުމާ މެދު މުހިންމު ބަހުސްތަކެއް ދަނީ ހިނގަމުންނެވެ. މި ސުވާލުތަކުގެ ސަބަބުން ކޮންމެހެން އެއްބަސްވުމަކާ ހަމައަށް ނުދެވިދާނެއެކޭ ނޫނެވެ. ނަމަވެސް މައްސަލައިގެ އެންމެ ފުނުގައި ހުރި ހުރިހާ ސުވާލުތަކެއް މިހާރު ހައްލުވެފައިވާ ކަމަށް ޤަބޫލުކޮށްގެން ތިބި ތިބުމަށް މިކަމުން ގޮންޖަހާލައެވެ.
ފުޅާ ނަޒަރަކުން ބަލާއިރު، އެއްބަސްވުމެއް އަވަސްކުރުމަށް ލަންޑަނަށް ދަތުރުކުރި ވަފުދަކަށް އެހެން ކަމެއްވެސް ހާސިލުވިކަމުގައި ބެލެވިދާނެއެވެ. އެއީ، މި ރަށްތަކަށް އަލުން ދުނިޔޭގެ ސަމާލުކަން ހޯދައިދިނުމުގެ ތެރެއިން، ޤާނޫނީ އިހުތިސާސާއި، އާބާދީ ތަމްސީލުވުމާއި، އަދި ގާނޫނީޞައްޙަކަމާ ބެހޭ އަސާސީ ސުވާލުތަކަކީ އަދިވެސް ހޫނު ބަހުސްތަކެއް ހިނގަމުންދާ ކަންތައްތައްކަން އެ ވަފުދުގެ މި ދަތުރުން ހާމަވުމެވެ. ހުށަހެޅިފައިވާ، ފޮއްޅަވައިގެ އިހުތިސާސް ބަދަލުކުރުމުގެ ކަންކަން ކުރިއަށްދިޔަޔަސް ނުވަތަ ނުދިޔަޔަސް، އެ ސުވާލުތައް ފިލައިގެންދާނެ ކަމަކަށް ނުބެލެވެއެވެ. އަދި މިހާރު ކުރިއަށްދާ ސިޔާސީ މަޝްވަރާތައް ނިމޭތާ އެތައް ދުވަހެއް ފަހުންވެސް، މި ރަށްތަކުގެ މުސްތަގުބަލާ މެދު ކުރެވޭ ބަހުސްތަކަށް އެކަމުގެ އަސަރު ފޯރަމުންދާނެއެވެ.